REIBONTECA

O 23 de abril foi o día do libro e aínda que non tiñamos previsto celebrar ningunha actividade especial ese día porque levamos varias semanas con actividades, finalmente decidimos celebralo contando un conto en inglés (Para iso celebramos que ese día tamén morreu Shakespeare). Escollemos un libro norteamericano que foi escrito hai máis de sesenta anos, GOOD NIGHT MOON . A encargada de facer a lectura foi unha das profesoras de inglés, neste caso, Dori. Aquí tendes algunhas imaxes da contadora e do tradutor. Xa estamos preparando máis sesións. Esperamos facer máis contadas en inglés en semanas vindeiras. Tamén invitamos á nai dun alumno de 1º para que nos conte algún en italiano. Pero antes, teremos unha sesión don dúas nenas que nos van contar dous dos seus contos favoritos.

Para celebrar o Día do Libro infantil tivemos a visita dos contacontos de Kalandraka que nos abalaron entre os ritmos do acordeón e as historias de Amelia quere un can, Paco e Crocodilo. Queredes saber como foi? Pois aquí tendes as fotos.

Para celebrar o día do libro infantil, durante todo o o venres estará aberta unha exposición de libros infantís publicados en diferentes linguas europeas, asiáticas e africanas. Poderedes ver libros xaponeses, coreanos, alemáns, belgas, holandeses, exipcios, Ingleses, turcos, húngaros, bascos ou cataláns. Neles poderedes apreciar que hai linguas que se len ao contrario que a nosa, que se escriben e se len en vertical. Unha chea de curiosidades que estamos seguros que vos han gustar.

María contounos un conto dos Bolechas. Sabíao moi ben porque é o libro favorito da súa irmá. Todos escoitaban moi atentos porque María falaba baixiño. Cando rematou déronlle un aplauso.

Iker contounos a historia do Pirata Pata de Lata , que a tiña moi aprendida, sabíao de memoria. Fíxonos percorrer o mundo enteiro para contarnos as aventuras deste feroz bucaneiro. E cando había que ter sono tíñase sono. Normal despois de tanto loitar .