OBXECTIVOS DE DESENVOLVEMENTO SOSTIBLE

 

Este curso, no Colexio de Reibón, o proxecto educativo baseado nos Obxectivos de Desenvolvemento Sostible (ODS) arrincou cunha actividade lúdica e educativa que puxo ao alumnado a investigar, pensar e moverse por todo o colexio. A biblioteca, como centro de recursos e aprendizaxe, foi o punto de partida dun xogo de preguntas que guiou aos nenos e nenas a descubrir os 17 ODS a través de pistas agochadas en diferentes recunchos do centro.

Un dos grandes éxitos desta actividade foi o fomento do traballo colaborativo. O alumnado tiña que resolver as preguntas xuntos, escoitarse e debater sobre as mellores solucións. Isto reforzou valores como o compañeirismo, o respecto polas opinións dos demais e a capacidade de tomar decisións en equipo, todos eles fundamentais para a construción dunha sociedade máis xusta e igualitaria, que é precisamente o que buscan os ODS.

Unha vez rematado o percorrido por todas as pistas, os equipos regresaron para a última tarefa: unir todo o aprendido e reflexionar sobre como os ODS afectan as súas vidas e o seu futuro. Cada equipo compartiu cos demais unha proposta de acción que poderían levar a cabo na súa contorna, dende campañas de reciclaxe ata actividades de sensibilización sobre a igualdade de xénero ou a protección dos espazos naturais.

A actividade, dinamizada pola biblioteca, foi o primeiro paso dun proxecto máis amplo que continuará durante todo o curso e que busca que cada alumno se converta en axente de cambio no seu propio entorno.